कांग्रेस उपसभापतिमा खड्का र गुरुङ विजयी, गच्छदार २ मतले पराजित
नव नेपाल |
काठमाडौँ । नेपाली कांग्रेसको उपसभापति पदमा पूर्णबहादुर खड्का र धनराज गुरुङ विजयी भएका छन् ।
बुधबार राति सम्पन्न मतगणनामा खड्काले २१२१ मत पाएर विजयी भए भने गुरुङ १९०८ मतका साथ निर्वाचित भएका हुन् ।
विजयकुमार गच्छदार भने उपसभापति हुन २ मतले रोकिए । उनले १९०६ मत पाए । खड्का शेरबहादुर देउवा पक्षका उम्मेदवार हुन भने गुरुङ शेखर कोइराला पक्षका उम्मेदवार हुन् ।
उपसभापतिमा विजयी खड्का निवर्तमान महामन्त्री हुन् भने गुरुङ केन्द्रीय सदस्य थिए । नेविसंघका पूर्व अध्यक्षसमेत रहेको गुरुङ शेखर कोइराला प्यानलबाट उपसभापति लडेका हुन् ।
चौथो स्थानमा रहेका डा. चन्द्र भण्डारीले १५८० मत पाए । सुजाता कोइरालाले ६४४, महेश आचार्यले ५८९ र दिव्यश्वरी शाहले १३२ मत प्राप्त गरेका छन्।
दुईजना सभापतिका लागि ७ जना उम्मेदवार चुनावी मैदानमा थिए । गत सोमबार भएको मतदानमा उपसभापति पदका लागि ४ हजार ६ सय ८९ मत खसेको थियो ।
देउवा कांग्रेस सभापतिमा निर्वाचित भइसकेका छन् । महामन्त्री पदको मतगणना आज (बिहीबार) बिहान हुने निर्वाचन समितिले जनाएको छ।
