नवलपुरको बौंदीकाली सडकसञ्जालबाट सम्पर्कविच्छेद, कालीगण्डकी पुलको डेढगाउँ खण्ड भासियो

नवलपुर । बिगत तीन दिनदेखिको अविरल वर्षाका कारण पूर्वी नवलपुरको बौंदीकाली गाउँपालिका सडक सञ्जालबाट विच्छेद बनेको छ ।

देशका अन्य क्षेत्रमा जस्तै गण्डकी प्रदेशमा पनि अविरल रुपमा परिरहेका कारण अन्य ठाउँबाट डेढगाउँ जोड्ने सम्पूर्ण सडकहरु क्षतविक्षत अवस्थामा रहेको डेढगाउँका उज्जल ओझाले बताए । ओझाका अनुसार देशको मुख्य राजमार्गसँग जोड्ने डेढगाउँको सबैभन्दा नजिकको बाटो भिमाद–मानपुर–डेढगाउँको सडक क्षतविक्षत अवस्थामा रहेको छ ।

कालोपत्रे गर्ने तयारीमा रहेको मानपुर–डेढगाउँ सडकखण्डमा तदारुकताका साथ काम हुन नसकेपछि र बाढीका कारण क्षतविक्षत बनेको छ ।

त्यस्तै सबैभन्दा ठूलो समस्याको रुपमा भर्खरै निर्माण सम्पन्न भएको कालीगण्डकीको पक्की पुलको डेढगाउँतर्फको भाग पनि भासिएको देखिएको छ ।

त्यस्तै डेढगाउँ जोड्ने कालीगण्डकी करिडोरको पाल्पाको रामपुर-डेढगाउँ र डेढगाउँ–गैडाँकोट खण्डमा पनि विभिन्न ठाउँमा पहिरो गएको जनाइएको छ ।

त्यस्तै डेढगाउँलाई तराईसँग जोड्ने सबैभन्दा छोटो सडकका रुपमा रहेको कावासोती, दलदले डेढगाउँ सडकखण्ड पहिरोका कारण क्षतिग्रस्त बनेको छ । त्यस्तै झ्यालबास-रूचाङ-डेढगाउ सडकखण्ड पनि क्षतविक्षत भएको छ ।

त्यस्तै बौंदीकालीको वडा नं. १ र २ जोड्ने बौंदीखोलाको सेरामा निर्माणाधीन अवस्थामा रहेको पुल पनि बगाएको जनाइएको छ ।

त्यस्तै निरन्दी खोलामा निर्माण गर्न लागिएको पुलको पिल्लरमा क्षति पुगेको छ भने गाउँपालिकाभित्रका अन्य वडाहरु जोड्ने अधिकांश सडकहरु पनि पहिरोको चपेटामा परेका छन् ।

तस्बिरहरूः

तस्बिहरूः उज्ज्वल ओझाको फेसबुकबाट