नेपाली सेनाका जर्नेलहरूको जिम्मेवारी हेरफेर, को-कहाँ पुगे ?

काठमाडौं । सेनाका जर्नेलहरुको काज फिर्ता तथा जिम्मेवारी हेरफेर भएको छ ।

प्राप्त विवरणअनुसार उत्तर पश्चिम पृतना हेडक्वार्टर, सुर्खेतका उपरथी हिरालाल जोशीलाई राष्ट्रिय सुरक्षा परिषद्को सचिवालयमा खटाइएको छ । त्यस्तै निरीक्षणाधिकृत विभागका उपरथी योगराज शर्मालाई आफ्नो जिम्मेवारीका साथै निमित्त विभागीय प्रमुख र प्रबन्धरथी विभागको समेत कार्य गर्न भनिएको छ ।

अर्का उपरथी सागरबहादुर थापाको पनि जिम्मेवारी फेरिएको छ । उनलाई उपत्यका पृतना हेडक्वार्टरमा रहेर कार्यरथी विभागको अतिरिक्त जिम्मेवारीबाट काज फिर्ता गरिएको छ ।

उपरथी कृष्णदेव भट्टलाई प्रबन्धरथी विभागबाट उत्तर पश्चिम पृतना हेडक्वार्टरमा निमित्त पृतनापतिको जिम्मा दिइएको छ । त्यस्तै सहायक रथी गणेशकुमार श्रेष्ठलाई वीरेन्द्र अस्पतालबाट कार्यरथी विभागको निमित्त कार्यरथी बनाइएको छ ।

मध्य पृतना हेडक्वार्टर,हेटौंडाबाट सहायक रथी यामबहादुर सापकोटालाई शोध तथा विकास निर्देशनालयमा निमित्त निर्देशक बनाइएको छ । अर्का सहायक रथी कृष्णबहादुर जिसीको मध्य पश्चिम पृतना हेडक्वार्टरअन्तर्गत शोध तथा विकास निर्देशनालयबाट काज फिर्ता गर्दै मध्य पश्चिम पृतना हेड क्वार्टरमा सरुवा गरिएको छ ।

सहायक रथी रामप्रसाद अधिकारीलाई असवाव निर्देशनालयबाट सैनिक सामग्री प्राप्ती निर्देशनालयको अतिरिक्त कार्यकाज फिर्ता गरिएको जंगी अड्डाको पत्रमा उल्लेख छ । जर्नेलहरुको सरुवाको बोधार्थ राष्ट्रिय सुरक्षा परिषद् सचिवालयलगायत सेनाका विभिन्न विभाग र सबै पृतना हेडक्वार्टरलाई दिइएको छ । -जनआस्थाबाट