सशस्त्रका यी दुई सईलाई गरियो निलम्बन

काठमाडौं । सशस्त्र प्रहरी बलमा कार्यरत दुईजना नायव निरीक्षक (सई) निलम्बनमा परेका छन् ।

आचरणविपरीत काम गरेको भन्दै सशस्त्रले २८ गण कपिलवस्तुमा कार्यरत गोविन्द सुवेदी र बीओपी छिन्नमस्ता सप्तरीमा कार्यरत कृष्णबहादुर मगरलाई निलम्बन गरी विभागीय कारबाहीको प्रक्रिया अगाडि बढाएको हो ।

सुवेदीमाथि सुरक्षा वेश स्थापनाको लागि सशस्त्र प्रहरी कर्मचारीहरु पुर्‍याई कार्यालय फर्कने क्रममा दिइएको जिम्मेवारी सही ढंगले निर्वाह नगरेको आरोप छ ।

यही कात्तिक ४ गते सुवेदीको नेतृत्वको टोली चढेको सशस्त्रको ट्रक बाणगंगा नगरपालिकाको सिउटीमा दुर्घटना भएको थियो । जसमा तीन जना सशस्त्र र एक जना सर्वसाधारणको मृत्यु भएको थियो भने सुवेदीसहित तीन जना घाइते भएका थिए ।

त्यस्तै मगरमाथि भने गत असोज २० गते भारतीय भूमिमा मृत अवस्थामा फेला परेका सहायक निरीक्षक सत्य नारायण यादवको घटनाको प्रारम्भिक छानबिनमा विभागीय नीति तथा आदेश विपरीत काम गरेको आरोप छ ।