मन्त्री लामाले ल्याए विकासको लहर, एकै दिन ३ योजनाको सिलान्यास

काभ्रे । काभ्रेबाट प्रदेशसभामा प्रतिनिधित्व गरी प्रदेश मन्त्री समेत बनेका तीर्थ लामा पछिल्ला दिनमा विकासका कार्यमा लागि परेका देखिएका छन् । बागमती प्रदेशका खानेपानी उर्जा तथा सिंचाइमन्त्री तिर्थ लामाले शिक्षा स्वास्थ्य क्षेत्रमा विभेद कायमै रहेको बताएका छन् ।

काभ्रेको तेमाल गाउँपालिका ६ मा रहेको पञ्चकन्या मावि प्राङ्गणमा आयोजित ठूलो पँधेरो ढुङ्गेधारा खानेपानी आयोजना शिलान्यास गर्दै मन्त्री लामाले शिक्षा स्वस्थ्य क्षेत्रमा रहेको विभेद अन्त्य गर्न जरुरी रहेको बताए ।

मन्त्री लामाले प्रजातन्त्रमा समान अवसरको पहुँच आम नागरिकमा हुनुपर्ने भन्दै तेमालको समग्र विकासका लागि आफु अहोरात्र खटिरहेको बताए । विकट गाउँमा व्याप्त अशिक्षा, वेरोजगारीलाई निर्मुल बनाउने दायित्वबोध महशुस गरेको उनको भनाई छ । तेमालमा चालू आर्थिक वर्षमा मात्रै ७ वटा खानेपानी र २ वटा सिचाईको आयोजना कार्यान्वयन लागि अघि बढाइएको उनले बताए । ठूलो पँधेरो ढुङ्गेधारा आयोजनाका लागि २० लाख रुपैया बजेट छुट्याइएको र अपुग रकमका लागि पहल गर्ने प्रतिवद्धता समेत व्यक्त गरे ।

उक्त कर्यक्रममा कान्छिमाया तामाङ फाउण्डेसनबार सो वडाका ६ वटा विद्यालयका विद्यार्थीहरुलाई पोशाक, स्टेशनरी सामाग्री हस्तान्तरण समेत गरिएको थियो । विभिन्न संघसंस्थाको सहयोगमा सो वडाको ६ विद्यालयमा अध्ययनरत ३५० बालबालिकालाई ट्रयाक सुट, स्वेटर, कापी, कलम, सिसाकलम लगायतका शैक्षिक सामाग्री वितरण गरिएको हो ।

वडामा रहेको पञ्चकन्या माध्यमिक विद्यालय, महांकाल आधारभूत विद्यालय, बुद्ध कोल्तोङ प्राथमिक विद्यालय, निर्मला प्राथमिक विद्यालय, सुनकन्या प्राथमिक विद्यालय र कालिदेवी प्राथमिक विद्यालयमा अध्ययनरत सबै विद्यार्थीको लागि ट्रयाक सुट, स्वेटर, आधा दर्जन कापी, १र१ दर्जन कलम, सिसाकलम वितरण गरिएको हो ।

सोही क्रममा मन्त्री लामाले तेमाल–५ पोखरी नारायणस्थानमा छोइतेन नाम्सुम छोइलिङ गुम्बाको शिलान्यास पनि गरेका छन् । धार्मिक पर्यटकिय क्षेत्र नारायणस्थानको विकास र आमनागरिकको सर्वाङ्गीण बिकासमा आफ्नो ध्यान सदैव रहिरहने प्रतिवद्धता व्यक्त गर्दै मन्त्री लामाले २५ लाख रुपैयाँ बजेट खर्चर गर्ने गरि उक्त गुम्बा निर्माणको शिलान्यास गरेका हुन् ।

त्यसैगरि मन्त्री लामाले सिंगटी लिप्ट खनेपानी आयोजनाको समेत मन्त्री लामाले शिलान्यास गरेका छन् । खानेपानीको समस्या भोगिरहेका तेमालबासीहरुलाई थप राहत दिने उद्देश्यले एक घर एक धारा अन्तर्गत उक्त लिफ्टीङको शिलान्यास गरिएको हो । ५० लाख बजेट बिनियोजन गरिएकोमा उक्त लिफ्टिङ आयोजना आगामी जेष्ठ भित्र सम्पन्न गरिसक्ने योजना रहेको छ ।