आफैंलाई जलाएका प्रेमलाई बचाउन डाक्टरहरुको अथक प्रयास असफल, अन्ततः बोल्दा-बोल्दै गए प्रेम…
नव नेपाल |
काठमाडौं । संसद् भवन नयाँ बानेश्वर अगाडि आत्मदाहको प्रयास गर्ने युवाको निधन भएको छ।
अन्ततः प्रेम प्रसाद आचार्यलाई बचाउने डाक्टरको प्रयास असफल भएको छ ।
उनको आज बिहान ५ बजे उपचारका क्रममा निधन भएको कीर्तिपुरस्थित बर्न अस्पतालका डाक्टर किरण नकर्मीले जानकारी दिए। शरिरको अधिकांश भाग जलेको हुनाले बचाउन नसकिएको उनको भनाइ छ।
मंगलबार दिउँसो शरीरमा पेट्रोल खन्याएर आत्मदाह प्रयास गर्दा इलामको सूर्योदय नगरपालिका निवासी ३७ वर्षीय प्रेमप्रसाद आचार्य गम्भीर घाइते भएका थिए। पेट्रोल खन्याएर आत्मदाह प्रयास गर्दा उनको शरीरको ८० प्रतिशत भाग जलेको थियो।
घटनास्थलबाट तत्कालै उद्दार कीर्तिपुरस्थित बर्न अस्पताल लगिएर उनको उपचार गरिएको थियो। मंगलबार साँझ स्वास्थ्य राज्यमन्त्री डाक्टर तोसिमा कार्की पनि उनलाई भेट्न अस्पताल पुगेकी थिइन्।
डा. तोसिमासँग प्रेमले राम्रैसँग दोहोरो वार्ता गरेको भिडियो सार्वजनिक भएको थियो । सार्वजनिक भिडियोमा उनले डा. तोसिमासँग आफ्ना कुरा गृहमन्त्री रवि लामिछानेसँग राखिदिनका लागि पनि अनुरोध गरेका थिए ।
डा. तोसिमा कार्कीले आफू पनि डाक्टर भएकोले हेर्न आएको बताउँदै प्रेमसँग केहीबेर कुराकानी गरेकी थिइन्. ।
उनको शव अहिले अस्पतालमा नै रहेको डाक्टर नकर्मीले बताए।
