वैशाख ३० का लागि ताेकियो स्थानीय तह निर्वाचन

काठमाडौं । सरकारले स्थानीय तहको निर्वाचन ३० वैशाख, २०७९ मा गर्ने निर्णय गरेको छ । मन्त्रिपरिषद्को अहिले बालुवाटारमा बसिरहेको बैठकले स्थानीय निर्वाचनको मिति तय गरेको एक मन्त्रीले जानकारी दिए ।

निर्वाचन आयोगले एकै चरणमा गर्ने भए १४ वैशाख र दुई चरणमा गर्ने भए १४ र २२ वैशाखको मिति सिफारिस गरेको थियो । तर सत्तारुढ पाँच दलीय गठबन्धनले जेठ मसान्तभित्र निर्वाचन गर्ने बताएपछि आयोगले ४ जेठ प्रस्ताव गर्‍यो ।

४ जेठमा चुनाव गर्दा केही दिन स्थानीय तह जनप्रतिनिधिविहीन हुने अवस्था आएपछि सरकारले नयाँ मिति प्रस्ताव गरेको हो । स्रोतका अनुसार सोमबार सरकारले निर्वाचन आयोगका पदाधिकारीहरुसँग नयाँ मितिबारे परामर्श गरेपछि अहिलेको मन्त्रीपरिषद् बैठकले उक्त निर्णय गरेको हो ।