विमानस्थलबाट सुनसहित प्युठानकी संगीता पक्राउ
नव नेपाल |
काठमाडौं । त्रिभुवन अन्तर्राष्ट्रिय विमानस्थलबाट सुनसहित एक महिला पक्राउ परेकी छन् ।
२ सय १० ग्राम तौल भएको विभिन्न गरगहनाको सुनसहित प्युठान ऐरावती गाउँपालिका–६ घर भएकी संगीता परियारलाई प्रहरीले पक्राउ गरेको हो।
फ्लाई दुबईको उडानद्वारा दुबईबाट काठमाडौं आएकी उनलाई त्रिभुवन अन्तर्राष्ट्रिय विमानस्थलको आगमन टनेल गेटमा जाँच गर्ने क्रममा सुन भेटिएको थियो।
भन्सार छली गरी लैजान लागेको सिक्री १ थान, ब्रासलेट १ थान, औंठी ३ थान, रानीहार १ थान, मिनिहार १ थान, मंगलसुत्र २ थान, कानमा लगाउने झुम्का २ जोर र औंठी १ थानसहित फेला पारी पक्राउ गरेको हो।
उनलाई आवश्यक अनुसन्धान तथा कारबाहीको लागि भन्सार कार्यालय गौचरमा बुझाइएको छ।
