सर्वोच्च न्यायाधीशका लागि ६ जना सिफारिस, यी हुन् सिफारिस भएकाहरू (सूचनासहित)
नव नेपाल |
काठमाडौं । न्यायपरिषदले सर्वोच्च अदालत न्यायाधीशका लागि ६ जनाको नाम सिफारिस गरेको छ ।
प्रधानन्यायाधीश विश्वम्भरप्रसाद श्रेष्ठको अध्यक्षतामा मंगलबार बसेको परिषदको बैठकले ४ जना उच्च अदालतका न्यायाधीश र २ जना कानुन व्यवसायीलाई सर्वोच्च अदालतको न्यायाधीशमा सिफारिस गरेको हो ।
न्यायपरिषद स्रोतका अनुसार, कानुन व्यवसायीबाट बालकृष्ण ढकाल र सुनिल पोखरेलको नाम सिफारिस भएको छ । उच्च अदालतका न्यायाधीशबाट सारंगा सुवेदी, महेश शर्मा पौडेल, टेकप्रसाद ढुंगाना र अब्दुल अजिद मुसलमान सिफारिस भएका छन् । रिक्त एक पदमा अझै सिफारिस भएको छैन ।
प्रस्तावित नाम संसदीय सुनुवाइ विशेष समितिबाट अनुमोदन भएपछि मात्रै उनीहरुको नियुक्ति हुनेछ ।
उच्च अदालत न्यायाधीशहरू सरूवाः
उच्च अदालत दिपायलका मुख्य न्यायाधीश नृपध्वज निरौलासहित १८ जना न्यायाधीशको सरुवा तथा काज सरुवा भएको छ ।
न्याय परिषद्को मंगलबार बसेको बैठकले निरौलालाई उच्च अदालत पाटनको मुख्य न्यायाधीशमा सरुवा गरेको छ भने उच्च अदालतमा नै कार्यरत चार जना न्यायाधीशको काज सिफारिस गरेको छ ।
बैठकले उच्च अदालतका न्यायाधीश टेकनारायण कुँवरलाई विशेष अदालतको अध्यक्षसहित सदस्य तोक्न परामर्श पनि दिएको छ ।
