कावासोतीको पिठौलीचौर कबर्डहलमा आयोजित ब्याडमिन्टन प्रतियोगिता सम्पन्न

कावासोती । पूर्वी नवलपुर जिल्लाको सदरमुकाम कावासोतीमा नगरस्तरीय व्याडमिन्टन प्रतियोगिता सम्पन्न भएको छ ।

शुक्रबार कावोसोतीको पिठौलीचौरस्थित ब्याडमिन्टन कवर्डहलमा सम्पन्न प्रतियोगितामा विजेता खेलाडीहरुलाई प्रमाणपत्रसहित ट्रफीले पुरस्कृत गरिएको थियो ।

डायमन्ड युथ क्लब र पिठौली ब्याडमिन्टन क्लबको आयोजनामा गरिएको उक्त प्रतियोगितामा कावासोती नगरपालिका भित्रका ३५ टिमको सहभागिता रहेको जनाइएको छ । सहभागी टिमको संख्या धेरै भएपछि दुई टोलि ‘ए’ र ‘बी’ समूह गरी दुई समूहमा खेल खेलाइएको प्रतियोगिताका संयोजक सागर गुरुङले जनाए ।

समूह ‘ए’को फाइनलमा नकुलचन्द ठकुरी र दिनेश क्षेत्रीको जोडीले दिपेन्द्र महतो र हेमराज महतोको जोडीलाई पराजित गर्दै उपाधि हात पारेका थिए ।

त्यस्तै टिम ‘बी’ तर्फ भने तिलकचन सापकोटा र नरेश परियारको जोडीलाई पराजित गर्दै आशिष र साजनको जोडीले प्रथम स्थान हासिल गरेका थिए ।

समग्रमा प्रतियोगितामा समूह ‘ए’को विजेता नकुलचन्द र दिनेश बनेका थिए भने उपविजेता दिपेन्द्र र हेमराज भएका थिए ।

त्यस्तै टिम ‘बी’ तर्फ आशिष र साजन विजेता बन्दा तिलकचन र नरेश उपविजेता भएका थिए ।

प्रतियोगितापछि कबर्डहलमै आयोजित समापन समारोहमा विजेता खेलाडीहरुलाई प्रमुख अतिथि एवं कावासोती नगरपालिका वडा नं. १२ का वडाध्यक्ष ध्रुव खनालले ट्रफीसहित प्रमाणपत्रले पुरस्कृत गरेका थिए ।

सञ्चारकर्मी निराजन पाण्डेयले सञ्चालन गरेको समापन कार्यक्रममा विशिष्ट अतिथि वडा नं. ११ का वडाध्यक्ष शारदाप्रसाद अधिकारीका साथी स्थानीय समाजसेवी बुद्ध गुरूङ, विनोद गुरूङलगायतकाे उपस्थिति रहेको थियो ।