बौंदीकालीमा अध्यक्ष कप अन्तरपालिका भलिबल हुँदै, प्रथमलाई डेढलाख पुरस्कार !

बौंदीकाली । पूर्वी नवलपुरको बौंदीकाली गाउँपालिकाले प्रथम गाउँपालिका अध्यक्ष कप अन्तरपालिका भलिबल प्रयोगिताको आयोजना गर्ने भएको छ ।

आगामी वैशाख २ गतेदेखि सुरु हुने प्रतियोगिताका लागि गाउँपालिकाले पूर्वी नवलपुरका सबै पालिकाहरुलाई सहभागिताका लागि आह्वान गरेको छ ।

बौंदीकाली गाउँपालिका स्तरीय खेलकुद समितिले आयोजना गर्न लागेको प्रतियोगितामा सहभागी हुनका लागि नयाँ वर्ष अर्थात् वैशाख १, २०७९ सम्मका लागि टिम दर्ता गर्नुपर्ने बौंदीकाली गाउँपालिकाद्वारा जारी सूचनामा उल्लेख गरिएको छ ।

वैशाख २ गतेदेखि ५ गतेसम्म बौंदीकाली गाउँपालिकाको वडा नं. २ स्थित अकलादेवी प्रांगण, डेढगाउँमा आयोजना हुने प्रतियोगितामा प्रत्येक टिमले खेलाडीको फोटो टाँस गरी सम्बन्धित पालिकाले प्रमाणित गरेर पठाउनुपर्ने उल्लेख गरिएको छ । त्यस्तै खेल नेपाल एफआईभिबि तथा भलिबल संघको नियमअनुसार नकआउटका आधारमा खेलाइने पनि जनाइएको छ ।

प्रतियोगितामा प्रथम हुने टिमलाई १ लाख ५० हजार, द्वितीयलाई ७५ हजार पुरस्कार राशी प्रदान गरिने जनाइएको छ भने सेमिफाइनल प्रवेश गरेको टिमलाई २० हजार पुरस्कार राशी प्रदान गरिने जनाइएको छ ।