सशस्त्रको उत्कृष्ट बाहिनीपतिको पुरस्कार डिआईजी शाहलाई !

काठमाडौं । सशस्त्र प्रहरी बल स्थापना दिवसका अवसरमा मुख्यालयले सशस्त्र प्रहरी महानिरीक्षक (डिआईजी) दिपेन्द्र शाहलाई उत्कृष्ट बाहिनीपतिको रुपमा पुरस्कृत गर्ने निर्णय गरेको छ ।

मधेश प्रदेश अन्तर्गतको छिन्नमस्ता वाहिनी बर्दिबासमा कार्यरत डिआइजी शाहलाई सशस्त्रका जम्मा आठ बाहिनीपति मध्ये उत्कृष्ट बाहिनीपतिको रुपमा पुरस्कृत गर्ने निर्णय गरेको हो ।

आठ जिल्लाको कमान्ड रहेको सो बाहिनीले सीमा सुरक्षामा समेत उल्लेख्य कार्य गरेको मूल्यांकन गर्दै पुरस्कृत गर्ने निर्णय भएको जनाइएको छ । मधेस प्रदेश सीमा सुरक्षाको दृष्टिले संवेदनशील रहेको र सीमामा हुने आपराधिक गतिविधि नियन्त्रण तथा राजश्व छलीलाई समेत न्यूनीकरण गरेको भन्दै सो बाहिनीका बाहिनीपति डिआइजी शाहलाई पुरस्कृत गर्ने निर्णय गरिएको हो ।

सशस्त्र प्रहरी बलले स्थापना दिवसका अवसर पारेर वर्षभर उत्कृष्ट भएका वाहिनी, तालिम केन्द्र, गण, गुल्म र युनिटहरूलाई हेडक्वार्टर हलचोकमा आयोजना गरिने विशेष समारोहबीच मंगलबार पुरस्कृत गर्ने गर्दछ ।