सेनाको स्काइ ट्रकमा सुर्खेत लगिँदै सुजन र वीरेन्द्रको शव

काठमाडौं । शुक्रबार ललितपुरको बालकुमारीमा मारिएका सुजन रावत र वीरेन्द्र शाहको शवको पोस्टमार्टम भइसकेको छ । हिजो दुवै जनाको पाटन अस्पतालमा पोस्टमार्टम गरिएको हो ।

आज दुवैको शव गृह जिल्लामा पठाउनका लागि त्रिभुवन अन्तर्राष्ट्रिय विमानस्थलमा लगिएको छ । नेपाली सेनको स्काई ट्रक एन ए–०६४ मार्फत दुवै जनाको शव सुर्खेत लैजाने तयारी गरिएको छ ।

सुर्खेतबाट हेलिकप्टरमा सुजन रावतको शव दैलेख र वीरेन्द्रको शव अछाम लैजाने तयारी छ ।

शुक्रबार रोजगार अनुमति प्रणाली (ईपीएस) मार्फत कोरियामा काम गर्न जान खोज्नेहरूले गरेको प्रदर्शन स्थलमा उनीहरु गम्भीर घाइते भएका थिए । उपचारका लागि अस्पताल पुर्याइएका उनीहरुको मृत्यु भएको थियो ।