जेन–जी प्रदर्शनः प्रहरीको गोली लागी अहिलेसम्म १४ जनाको मृत्यु, सयौं घाइते

काठमाडौं । नयाँबानेश्वरमा जेनजी प्रदर्शनका क्रममा भएको प्रहरी–प्रदर्शनकारीबीचको झडपमा मृत्यु हुनेको संख्या १४ पुगेको छ। राजधानीका विभिन्न अस्पतालमा सयौं घाइते उपचाररत रहेका छन्, जसमा धेरैको अवस्था गम्भीर छ। ट्रमा सेन्टरमा ६ जनाको मृत्यु सोमबार दिउँसो भएको झडपपछि घाइते भएर राष्ट्रिय ट्रमा सेन्टरमा लगिएका ६ प्रदर्शनकारीको मृत्यु भएको छ। ट्रमा स्रोतका अनुसार मृतकहरुको छाती, तिघ्रा र टाउकोमा गोली लागेको थियो। अहिले पनि ४० जना उपचाररत छन्, जसमा १५ जना गम्भीर घाइते छन्। निजामती अस्पतालमा ३ जनाको मृत्यु सिभिल अस्पतालमा उपचारका क्रममा ३ जनाको मृत्यु भएको छ भने १०० भन्दा बढी घाइते उपचाररत छन्। अस्पतालका कार्यकारी निर्देशक डा. मोहनचन्द्र रेग्मीका अनुसार गम्भीर घाइतेमध्ये १४ जनालाई अन्यत्र रेफर गरिएको छ। एभरेष्ट, केएमसी र त्रिविमा पनि मृत्यु काठमाडौं मेडिकल कलेज शिक्षण अस्पताल (केएमसी)मा एक जनाको मृत्यु भएको छ भने अन्य २० जना उपचाररत छन्। त्यस्तै, त्रिवि शिक्षण अस्पतालमा पनि एक जनाको मृत्यु भएको छ। त्यहाँ अन्य ९ जनाको उपचार भइरहेको अस्पतालका सूचना अधिकारी कालीप्रसाद रोसियारले जानकारी दिए। यस्तै एभरेष्ट अस्पतालमा पनि ३ जना जनाकाे मृत्यु भएको छ। सुरक्षाकर्मीले भीड नियन्त्रणका लागि चलाएको गोलीका कारण ठूलो मानवीय क्षति भएको छ। विभिन्न अस्पतालमा शल्यक्रियाको चाप बढेको छ भने घाइतेमध्ये कैयौँको अवस्था अझै पनि गम्भीर छ।