जेनजीको आक्रमणमा परेका देउवा दम्पती पहिलोपटक सार्वजनिक
नव नेपाल |
काठमाडौं । भदौ २४ गते भएको जेनजी आन्दोलनका क्रममा प्रदर्शनकारीबाट आफ्नै घरमा कुटिएका नेपाली कांग्रेसका सभापति शेरबहादुर देउवा आज पहिलोपटक सार्वजनिक भएका छन् ।
मंगलबार पार्टी केन्द्रीय कार्यालय सानेपामा बसेको केन्द्रीय समिति बैठकमा जाने क्रममा देउवा सार्वजनिक भएका हुन् ।
बुढानीलकण्ठस्थित आफ्नै घरमा कुटपिटमा परेका देउवा आजभन्दा अघि सार्वजनिक रुपमा देखिएका थिएनन् ।
नेपाली सेनाले बुढानीलकण्ठबाट उनीसहित पत्नी आरजु राणा देउवालाई उद्धार गरेको थियो । सेनाले स्थलमार्गबार्ट उनीहरूलाई अस्पताल लगेको थियो ।
सुरक्षाको कारण देखाउँदै देउवाको उपचार कहाँ गरिएको भन्ने खुलाइएको थिएन । टाउकोमा गम्भीर चोट लागेका देउवालाई १२ टाँका लगाइएको भन्दै केही दिन पछि मात्रै पत्रकार सम्मेलनमार्फत कांग्रेस नेता मीन विश्वकर्माले जानकारी गराएका थिए ।
सभापति देउवासँगै उनकी पत्नी आरजु राणा देउवा पनि आजै सार्वजनिक भएकी छन् । जेनजी आन्दोलनका क्रममा आरजुमाथि पनि संघातिक आक्रमण भएको थियो ।
